Ayt-zikk d willi agh izwaren s tudert ssenen, sfelden, negh akkw zeran, ma iggutn n imariren ttubdarnin gh umzruy bahra ghezzifn n umarg d uzawan amazigh gh temazirt n Suss d tamwin nes.
Ay-lli igan tidet, medden ann gan imuzzulen[1] d uggar. Acku sulen gh tiwwtin[2] lligh dderen man zund imsugren d inmghuren ann. Meqqar ur ad ten-id akkw ismun imi, rad gisen nebder igllinen n Hemmu Uttalb, Hajj Belàid, Bubaker Anccad, Bubaker Azàri d wiyyad d wiyyad.
Macc, ad akkw gigh ur ilint tasmin[3], ura nekkni, ayt-tesket ad negh, tesaha i agh taghamt negh am imzwura. S teguri yadn, ura nekkni nega imuzzulen. S manik ? Acku nemmaqqar-d d man zund Izenzaren. Uggar, is d akkw disen nemqqur, niwssir d disen ; nesfeld asen ur d imikk ; nzer ten gh imussuten urd yat tekklit ura snat ; nebuder ten gh isaragen nna gh agh nn-smaqqaren ussan.
Igh uttegh awal gh tuzzumt[4], ur nnigh rad temmjiggiren sin medden ar-id f tidet ad : tarabbut n Izenzaren ur illa ma rad s tt sul iduràu gh tizi ad negh. Maxx awal ad ? Acku tesyafu s kigan, tefk -d ar ka sul takka- yat tidri bahra ighwban, yan w addur bahra icfan[5], d yat tuggugt bahra ighzzifn i tiyssi tadelsant, slawattin gh ubaraz n tallghat d tizlit Tamazight.
Gh umnid inu, zedaregh ad akkw inigh, sul alsegh ur d yat tekklit ura snat: afulki n Izenzaren, lli ur ilin ibuda ura sul ttemi, ur ad sis issen amer kra n yan nna ur issen afulki ura issnker t id. Meqqar man zund anaw ad n gar medden idrus gh dar Imazighen, macc llan, gen akkw tuggwt gh igmamen[6] n tenbadt n Lmxzen d idawa nes, lli – ur akkw nnigh is fella-wen intel- ur innan a(y) amar n Umazigh ura sul adu nes.
Macc, inna ka skeren, timmuzgha ur as kkan mani, rad asen bedda am tazzit n(w) angha neghd akkw uggar akkw sul d imikk : tihbbit n idammen ittwizwizn, id d uzal, gh izzi n taghmiwin nsen. Inna gh sersen tabanna ar ten temrrat, ar asen teskar iwiz d tewwingimin!
Infulen[7]
S izwar akkw, illa fell-agh ad nini sul nales yat tidet iqqurn : hann a medden, Izenzaren ur d ka deren gh igenna. Hati ur gan imezza gh temazirt ura irzzef agh ten-id kra n yan. Izenzaren lan izuran am win w argan. Ddemen bahra gh(w) akal ar d-ssan gh(w) aman n idels d umzruy amazigh.
Macc, mani d tekka tamaggwt[8] n tezenzart ? S tidet, tesfald ar d-ttal agayyu zegh izwura n isggwasen n krad ignaren n tasut lli izrin. Mad akkw yiwin may-ann ? Gh yat tesga, n iàzriyen d ifrexan gh usunen n Suss ar swingimen ad sggrun gh umadal n uzawan acku mad asen issutln ar akkw ittnfal. Gh yat tesga yadn, amarg n rrways d ihwacen ur ar asen sul ittkkes fadd ura sul irifi. S yat teguri yadn, ixessa ten kra yadn. Zegh akud ann, ad nn-gan tuggwas nsen fadd ad allen tisilawin n usmaynu d usenflul n temakkasut[9] Tamazight.
Mek-lli akkw illan gh iguyya nnun, udem n Suss ar d ittgga kra yadn. Ur ur sul iga mek-lli yad-lli s t inn ikka mad izrin. Ufigh akkw ad inigh : igh nn fell-as ittata yan rad akkw fell-as icqqu ad t sul yakwz igh d-yuda. Fadd ad bahra ur nessugwt gh uhrray, tisghramin n manzund Agadir, Tiznit, Tarudant, Warzazat, Agwlmim, Inezgan… gant kra yadn. Acku ur sul mezziynt, is d akkw meqqurent bahra. Akkw may-ann ur ad yili, ura rad yili mladd is ur illa ubeddad d tewisi n ayt-temazirt lli d iwin iqqariden gh berra, lli smunen taryalt d ult-ma-s, fadd ad ten kerzen gh(w) akal n temazirt negh.
Mek-lli tessenem, Imazighen, lligh izza laz, takrrayt d ustama, gh tuggwt nsen yan uzmez ann ur yaggugn, ffughen s(w) afdan d(w) afdan. Had ma iddan s izzelmd neghd iffus n(w) ammur negh ; had netta mad akkw ibbin aman n Bughaz, iftu s Europpa izrin tudert nes gh ismdan n isawriyen n uzzal d(w) anas jddernin.
Uggar akkw, illa netta yan ufuss, ur ifeka ccur ura ssiwdent tillas n(w) aman n Ugaraw. Is d akkw ikka ttemi i tegizult lligh isker timizar bahra nn yaggugn, am Marikan, Kanada d tiyyadd tiyyad. Ay-lli s righ ad t inigh s teguriwin ad inu : Imazighen ur nn sul qqenen iguyya nsen gh temazirt, acku ffughen, zeran. S(w) awal yadn, msawalen d tuwwt nsen s mek-lli s t inn ur tamen ighnanen nsen. Acku azmez ad asen t id iwin, is asent akkw isghwi, ig asen t d bezziz.
Tamust[10]
Ixf n(w) awal, Imazighen, ura netteni, mmuteln d usmadal gen as akkw tiwwa, macc ad ur nettu ad nesskwti yat tidet iqqurn : ur jju d nettni ad isellemen ura fellen-nn gh temagit d temust ura sul tamazirt nsen. Is haqqan skeren s mek-lli s yad-lli ttinin ayt-zikk : igh ur tessent mani d-tekkit, ur ad tessent mani twadst.
Fadd ad awen fawent teghawsiwin lli f tent gligh, tessenem ma s righ ad t inigh, rad awen fkegh yan umdya mezziyn gh ubaraz n uzawan d umarg lli issighwzin. Yat gh teyafutin n unmuqqar n Imazighen d umadal tegat terabbut ittubdarn n Izenzaren.
Meqqar medden ad ar kkaten imassen lli d-iwin gh dar Ayt-Tagut[11], qqenen i telghat Tamazight yat telmsit yadn, ittugnan gh yan uzetta bahra iziln lli bedda izzuren gh(w) akal n idles d umzruy negh. Is d akkw sggwran ay-lli t inn jju ur ikkan. Acku ggernen-nn gh temdyazin nsen i immukrisen f jju ur isawl ura ismurg gisent umarir amazigh gh mad izrin : izerfan n ufgan, udemawen d usnuhyu, azeddim, tadimukratit, timmukrisin tikulijiyin….
Waxxa syafagh is ar ttalsegh i(w) awal, macc illa fell- ad awen d skkwtigh mas llant terubba yadn lli d izwarn Izenzaren. Nettenti ad asent imlan agharas, sersent asen azru n tasila lli f ullen asnfar azawnan. Rad gis nebder kradt lli nessen : Tabghaynuzt –tad agh ilmed s umdya Iggut d Ccamx imassen n imzad d banjo-, Imurigen lli d iffaghen s ubaraz gh ussggwass n 1967 d Laqdam lli ittuskarn gh izwura n 1970.
Maxx ?
Macc yat teghawsa ar yyi bedda teskar attan igan urd imikk. Maxx ura nesker manik ad nawes i Izenzaren ? Hati ur ar sawalegh f uwnk aàrubi n Rbadt, lli s akkw tessenem, ur izera abra anaw n Nass El-Ghiwan d Lhajja Hamdawiya lli mu irzzef s turagin[12] n usmattay d teghawsiwin yadn lli mu d ur niwi anghmis. Mek-lli s ar ttinin ayt-zikk : ajj at ka aram ann ad igwin, imma iggut w awal idrus mad issen !
Urri at agh d ka f ay-lli f tegligh : uhu ay ayt-ma imghraten, ar sawalegh ghar f Imazighen negh n Suss Meqqurn d tesggwin nes. Medden ssenen akkw masdd Izenzaren is gan id bu-ssiàr iggutn. Is ar ten ka ttasin ulawen nsen. May-ann af ur sar ran ad aderen ixfawen nsen ad asen ismun kra n yan ura ad asen t ifek ghik-ann ka.
Ma za rad nesker ? Dar-i yat teswinigimt. Ad nzeli s umedya yan (w) ass n Izenzaren kra igat assggwass, nessagh as Ass n Izenzaren. Ma rad ig uderas nes ? Ikka afella is rad d sis ngher i igmamen n Izenzaren ad gis hderen, miqqiren disen imarayen nsen, wid mezziynin ur ad wid meqqurnin. Uggar akkw, rad sis nawi imsiggilen gh uzawan amazigh s umata, ura win Izenzaren. Fadd ad gis snefkan wid ifkan ixf i(w) uzawan amazigh turmin d teswinigimin nsen.
Awttas akkw n man zund tiwwuriwin ad rad t ig: ad nessigez azawan amazigh s umzizal. D ad nn-gguws akkw temhdiyin lli sul illan gh idels negh. Ad tent ur najj ad ddunt ghik-ann ur agh fekant meqqar ghar imikk n igummuten[13].
Macc, ur ta hiyyigh amagrad ad inu, iqqan-d ad nemmagh s aynn mu nufa, igh nera ad nmel assisn negh s ufulki n Izenzaren, ad neg assagh nsen i kra n tesukt, kra n usrir neghd kra n temrselt fadd ad ten jju ur nettu. Gh tuqqla ad ig may-ann tillawt kra n(w) ass nn ur yaggugn, ar sitimegh tudert ghzzifn i Izenzaren ura sul imarayen nsen!
[1] chanceux
[2] Epoques
[3] Jalousie
[4] Pour résumer
[5] Large
[6] Membres
[7] Changements
[8] Phénomène
[9] Héritage
[10] Identité. On peut aussi dire tiysi, taysi, taraka, tafuli.
[11] Les Occidentaux
[12] Licences, agréments. On peut aussi dire tujawin ou tayjiwin. .
[13] Fruits
